नागपूर : मनोज जरांगे पाटील यांच्या आंदोलनापेक्षा सध्या राज्यातील दुष्काळसदृश परिस्थिती आणि शेतकऱ्यांचा प्रश्न अधिक महत्त्वाचा असल्याचे महसूलमंत्री चंद्रशेखर बावनकुळे यांनी म्हटले आहे. राज्यातील १८ जिल्ह्यांमध्ये पावसाचे प्रमाण कमी असून काही ठिकाणी पिके करपण्याची परिस्थिती निर्माण झाली आहे. या पार्श्वभूमीवर सरकारचे सध्या दुष्काळी परिस्थितीकडे लक्ष असल्याचे त्यांनी सांगितले.
बावनकुळे म्हणाले, मुंबईत आंदोलन झाल्यास कायदा आणि सुव्यवस्थेचा प्रश्न निर्माण होऊ शकतो. गणेशोत्सव हा महाराष्ट्रातील मोठा सण असून या काळात मुंबईत मोठ्या प्रमाणात गर्दी असते. त्यामुळे सर्व आंदोलकांनी गणेशोत्सवाच्या काळात मुंबईत आंदोलन टाळावे, असे आवाहन त्यांनी केले.
मुंबईतील आंदोलनाबाबत उच्च न्यायालयाने दिलेले निर्णय लक्षात घेता कायदा आणि सुव्यवस्थेची परिस्थिती बिघडणार नाही, याची काळजी घेणे आवश्यक आहे. ओबीसी असो किंवा मराठा समाज, कोणाचाही हक्क डावलला जाऊ नये, अशी सरकारची भूमिका असल्याचेही बावनकुळे यांनी स्पष्ट केले.
मराठा समाजाच्या मागण्यांबाबत मुख्यमंत्री देवेंद्र फडणवीस आणि एकनाथ शिंदे यांच्या कार्यकाळात अनेक निर्णय घेण्यात आले आहेत. सरकार मराठा समाजाला न्याय देण्याच्या भूमिकेतून काम करत असून त्यासाठी सरकारला थोडा वेळ द्यायला हवा, असेही त्यांनी सांगितले.
१८ जिल्ह्यांमध्ये कमी पाऊस
राज्यातील १८ जिल्ह्यांमध्ये पाऊस कमी झाल्याने शेतीवर त्याचा परिणाम झाला आहे. शेतकऱ्यांना या परिस्थितीत मदत कशी करता येईल, यावर सरकारचे लक्ष आहे. शेतकरी अडचणीत येऊ नयेत आणि आत्महत्येसारखी परिस्थिती निर्माण होऊ नये, याला प्राधान्य दिले जात असल्याचे बावनकुळे यांनी सांगितले.
दुष्काळी परिस्थितीचा आढावा घेण्यासाठी जिल्हाधिकाऱ्यांची बैठक घेण्यात आली असून पुन्हा बैठक घेण्यात येणार आहे. प्रत्येक जिल्ह्यातील परिस्थितीचा प्रत्यक्ष आढावा घेऊन आवश्यक उपाययोजना करण्याच्या सूचना मुख्यमंत्र्यांनी दिल्या आहेत.
जिल्हानिहाय परिस्थितीचा अहवाल तयार करून तो आगामी मंत्रिमंडळ बैठकीत मांडण्यात येणार आहे. मंगळवारी मुख्यमंत्र्यांना राज्यातील परिस्थितीचा सविस्तर आढावा देण्यात येईल. तसेच पालकमंत्री, जिल्हा प्रशासन आणि संबंधित यंत्रणा दुष्काळी परिस्थितीची पाहणी करणार असल्याचे बावनकुळे यांनी सांगितले.