स्मित मच्छार यांच्यावरील हल्ला; ओमानी सहवैमानिकाबाबत नवी माहिती समोर

नवी दिल्ली : फ्लाय दुबईच्या FZ 1073 विमानातील कॉकपिट घटनेच्या तपासात आता ओमानी सहवैमानिकाबाबत काही महत्त्वाची माहिती समोर आली आहे. भारतीय कॅप्टन स्मित मच्छार यांच्यावर विमानात हल्ला झाल्यानंतर हे विमान सौदी अरेबियातील तबूक येथे वळवण्यात आले होते. या प्रकरणाचा अधिकृत तपास सध्या सुरू आहे.

या घटनेतील ओमानी सहवैमानिकाचे नाव हमाम अल-हमामी असल्याचे सांगितले जात आहे. त्याची ओळख अद्याप अधिकृतपणे जाहीर झालेली नसली तरी, तपासाशी संबंधित सूत्रांचा हवाला देत काही माध्यमांनी हे नाव प्रसिद्ध केले आहे.

ओमानमध्ये यापूर्वी विमान उड्डाणावर निर्बंध?

हमाम अल-हमामी याने यापूर्वी ओमान एअरमध्ये वैमानिक प्रशिक्षण घेतल्याचे वृत्त आहे. त्याच्या पार्श्वभूमीबाबत तपास करताना काही संशयास्पद बाबी अधिकाऱ्यांच्या निदर्शनास आल्याचा दावा करण्यात आला आहे. त्यानंतर त्याला वैमानिक म्हणून काम करण्यापासून रोखण्यात आल्याचेही काही वृत्तांत म्हटले आहे. मात्र या दाव्यांची अधिकृत तपासातून पुष्टी होणे बाकी आहे.

काही माध्यमांनी त्याच्या कथित कट्टर विचारसरणीबाबतही वृत्त दिले आहे. त्याच्या सोशल मीडिया हालचाली आणि पूर्वीच्या पार्श्वभूमीची चौकशी केली जात असल्याचे सांगितले जात आहे. मात्र या सर्व बाबी सध्या तपासाचा भाग असून, घटनेमागील नेमका हेतू अद्याप निश्चित झालेला नाही.

विमानात नेमकं काय घडलं?

30 सप्टेंबर रोजी दुबईहून तेल अवीवकडे जाणाऱ्या FZ 1073 विमानात कॉकपिटमध्ये पायलट आणि सहवैमानिकामध्ये गंभीर घटना घडली. सौदी अरेबियाच्या प्राथमिक तपासानुसार, सहवैमानिकाने कॅप्टनवर हल्ला केला आणि दोन्ही पायलट जखमी झाले. त्यानंतर विमान तबूक विमानतळावर सुरक्षित उतरवण्यात आले.

या प्रसंगी विमानातील काही प्रवासी आणि इतर वैमानिकांनी परिस्थिती नियंत्रणात आणण्यासाठी मदत केली. फ्लाय दुबईचे सीईओ गैथ अल गैथ यांनी कॅप्टन, क्रू, विमान सुरक्षित उतरविणाऱ्या वैमानिकांसह मदत करणाऱ्या प्रवाशांचे कौतुक केले आहे.

तपासातून नेमकं सत्य समोर येणार

या घटनेमागील कारण आणि सहवैमानिकाचा नेमका हेतू काय होता, याचा तपास विविध यंत्रणांकडून केला जात आहे. फ्लाय दुबईनेही पूर्ण अधिकृत तपास सुरू असल्याचे स्पष्ट केले आहे. त्यामुळे हमाम अल-हमामीची पार्श्वभूमी, त्याचे कथित विचार आणि या घटनेमागील उद्देश याबाबत अधिकृत तपासातूनच अंतिम चित्र स्पष्ट होणार आहे.

दरम्यान, घटनेनंतर फ्लाय दुबईने इस्रायलला जाणाऱ्या आणि तेथून येणाऱ्या विमानसेवा तपास पूर्ण होईपर्यंत तात्पुरत्या स्वरूपात स्थगित केल्या आहेत.