मुंबई : बॉक्स ऑफिसवर चांगली कामगिरी करणाऱ्या ‘हनुमान अंश’ चित्रपटाच्या टीमने महाराष्ट्राचे मुख्यमंत्री देवेंद्र फडणवीस यांची मुंबईतील अधिकृत निवासस्थानी ‘वर्षा’ येथे भेट घेतली. गणेशोत्सवाच्या पार्श्वभूमीवर झालेल्या या भेटीत टीमने गणपती बाप्पांचे दर्शन घेतले. मुख्यमंत्री फडणवीस यांनी दिग्दर्शक डॉ. विशाल चतुर्वेदी आणि त्यांच्या संपूर्ण टीमचे अभिनंदन करत आगामी प्रकल्पांसाठी शुभेच्छा दिल्या.
फडणवीस यांनी या भेटीचा व्हिडीओ आणि छायाचित्रे सोशल मीडियावर शेअर केली. ‘हनुमान अंश’च्या टीमचे ‘वर्षा’वर स्वागत करताना आनंद झाला. गणपती बाप्पांचे आशीर्वाद घेतल्यानंतर विशाल चतुर्वेदी आणि त्यांच्या टीमचे उत्कृष्ट कामाबद्दल अभिनंदन केले, अशी भावना त्यांनी व्यक्त केली.
बॉक्स ऑफिसवर चित्रपटाची दमदार वाटचाल
नीम करोली बाबा यांच्या जीवनावर आधारित ‘हनुमान अंश’ हा आध्यात्मिक विषयावरचा चित्रपट असून विशाल चतुर्वेदी यांनी त्याचे लेखन आणि दिग्दर्शन केले आहे. ७ ऑगस्ट २०२६ रोजी प्रदर्शित झालेल्या या चित्रपटाला सुरुवातीला मर्यादित प्रतिसाद मिळाला. मात्र, प्रेक्षकांकडून मिळालेल्या सकारात्मक प्रतिक्रियांमुळे चित्रपटाची कमाई पुढील काळात वाढत गेली.
चित्रपटाने ४१ दिवसांत जगभरात ३०० कोटी रुपयांचा टप्पा ओलांडला होता. १८ सप्टेंबरपर्यंतच्या उपलब्ध आकडेवारीनुसार, त्याची जगभरातील कमाई ३०९ कोटी रुपयांहून अधिक झाली होती. त्यानंतरच्या आकडेवारीतही चित्रपटाची कमाई वाढत असल्याचे दिसून आले आहे.
कमी गाजावाजात प्रदर्शित झालेल्या या चित्रपटाला प्रेक्षकांच्या ‘वर्ड ऑफ माउथ’चा फायदा झाला. त्यामुळे चित्रपटाच्या टीमसाठी मुख्यमंत्र्यांची भेट आणि त्यांच्याकडून मिळालेले कौतुक हा विशेष क्षण ठरला आहे.
पुढील प्रकल्पाचीही तयारी
‘हनुमान अंश’च्या यशानंतर दिग्दर्शक विशाल चतुर्वेदी यांच्या आगामी प्रकल्पांकडेही लक्ष लागले आहे. त्यांच्या पुढील प्रकल्पांपैकी ‘रामबोला – द इमॉर्टल स्टोरी ऑफ गोस्वामी तुलसीदास’ हा गोस्वामी तुलसीदास यांच्या जीवनावर आधारित चित्रपट असल्याची माहिती समोर आली आहे.