नालासोपाऱ्यात केकमध्ये पाल आढळल्याचा दावा

नालासोपाऱ्यात केकमध्ये पाल आढळल्याचा दावा; ७ मुलांसह ११ जणांना विषबाधेची लक्षणे
नालासोपारा : वाढदिवसाच्या कार्यक्रमात केक खाल्ल्यानंतर ७ लहान मुलांसह ११ जणांना त्रास झाल्याची धक्कादायक घटना नालासोपारा पूर्वेतील जिजाई नगर परिसरात घडली. केकच्या उर्वरित भागात पालसदृश अंश आढळल्याचा दावा करण्यात आला असून, सर्व बाधितांना उपचारासाठी रुग्णालयात दाखल करण्यात आले आहे.

शनिवारी सायंकाळी एका कुटुंबात वाढदिवसाचा कार्यक्रम आयोजित करण्यात आला होता. यासाठी नातेवाईक आणि मित्रमंडळी एकत्र आली होती. केक कापून उपस्थितांनी तो खाल्ल्यानंतर काही वेळातच काही जणांना अस्वस्थ वाटू लागले.

यानंतर पोटदुखी, छातीत वेदना, मळमळ, उलटी आणि जुलाब यांसारखी लक्षणे दिसू लागली. केकच्या उर्वरित भागाची तपासणी केली असता त्यामध्ये पालसदृश अंश आढळल्याचे सांगण्यात आले. या प्रकारामुळे कार्यक्रमस्थळी एकच खळबळ उडाली.

४ जणांवर ICUमध्ये उपचार
त्रास वाढल्यानंतर ७ मुले आणि ४ प्रौढ अशा एकूण ११ जणांना नालासोपारा येथील विजयलक्ष्मी रुग्णालयात दाखल करण्यात आले.

रुग्णालयातील डॉक्टरांच्या माहितीनुसार, शनिवारी रात्री सुमारे आठच्या सुमारास सर्व रुग्णांना रुग्णालयात आणण्यात आले. त्यांच्यावर तातडीने उपचार सुरू करण्यात आले. यापैकी ४ जणांना अतिदक्षता विभागात (ICU) दाखल करण्यात आले असून, उर्वरित रुग्णांवर जनरल वॉर्डमध्ये उपचार सुरू आहेत.

सध्या सर्व रुग्णांची प्रकृती स्थिर असल्याचे डॉक्टरांनी सांगितले आहे.

केक कुठून आणला? तपास सुरू
केक नेमका कोणत्या बेकरीतून आणण्यात आला होता आणि त्यामध्ये पालसदृश अंश कसा आढळला, याबाबत आता तपास सुरू आहे. घटनेची अधिकृत कारणमीमांसा तपासानंतरच स्पष्ट होणार आहे.

दरम्यान, या घटनेनंतर परिसरातील नागरिकांमध्ये संताप व्यक्त होत आहे. खाद्यपदार्थांच्या गुणवत्तेबाबत निष्काळजीपणा होत असल्यास त्याचा थेट परिणाम नागरिकांच्या आरोग्यावर होऊ शकतो, त्यामुळे संबंधित यंत्रणांनी या प्रकरणाची गांभीर्याने दखल घ्यावी, अशी मागणी होत आहे.

बेकरी उत्पादनांची तपासणी करण्याची मागणी
वसई-विरार परिसरातील बेकरी आणि खाद्यपदार्थ विक्री केंद्रांमधील उत्पादनांची अन्न व औषध प्रशासनाने (FDA) तपासणी करावी, अशी मागणी नागरिकांकडून करण्यात येत आहे.

या प्रकरणात नेमकी चूक कुठे झाली, केकमध्ये परदेशी पदार्थ कसा आढळला आणि त्याचा रुग्णांच्या प्रकृतीवर किती परिणाम झाला, याचा तपास झाल्यानंतरच संपूर्ण चित्र स्पष्ट होणार आहे.