‘ते काही संत नाहीत…’; दीपके, दास आणि रंका यांच्याबाबत सोनम वांगचुक यांचे स्पष्ट मत

राजकीय महत्त्वाकांक्षा असणे चुकीचे नाही; मात्र व्यासपीठ राजकीय पक्ष बनू नये, वांगचुक यांची भूमिका

नवी दिल्ली- सामाजिक आणि पर्यावरणीय प्रश्नांवर सातत्याने आवाज उठविणारे कार्यकर्ते सोनम वांगचुक यांनी ‘कॉकरोच जनता पार्टी’शी संबंधित अभिजित दीपके, सौरव दास आणि आशुतोष रंका यांच्याबाबत स्पष्ट भूमिका मांडली आहे. या व्यक्तींना राजकीय महत्त्वाकांक्षा असू शकतात आणि त्यात गैर काहीच नाही, असे वांगचुक यांनी म्हटले आहे. मात्र, ज्या व्यासपीठावरून सामाजिक प्रश्न मांडले जात आहेत, ते थेट राजकीय पक्षाच्या स्वरूपात जाऊ नये, असेही त्यांनी स्पष्ट केले.

एका पॉडकास्टमध्ये बोलताना वांगचुक म्हणाले की, संबंधित व्यक्तींच्या राजकीय महत्त्वाकांक्षा असण्याची शक्यता त्यांनी नाकारलेली नाही. राजकारणात येण्याची इच्छा असणे ही चुकीची बाब नाही. मात्र, सध्या उभे केलेले व्यासपीठ राजकीय पक्ष म्हणून सुरू करण्यात आलेले नसल्याने त्याची विश्वासार्हता आणि तटस्थता कायम ठेवणे गरजेचे आहे.

हे व्यासपीठ तटस्थ ठेवून राजकीय दबावगट म्हणून कार्य केले, तर त्यातून अधिक परिणामकारक काम करता येईल, असे वांगचुक यांनी सांगितले. व्यासपीठाचे थेट राजकीयीकरण झाले नाही, तर सामान्य नागरिकांचा त्यावरील विश्वास आणखी वाढेल, असेही त्यांनी नमूद केले.

भविष्यात संबंधित व्यक्तींना एखाद्या राजकीय पक्षात प्रवेश करता येईल किंवा स्वतंत्र राजकीय पक्ष स्थापन करता येईल. मात्र, सध्याच्या व्यासपीठाची भूमिका आणि त्याची पवित्रता कायम राहणे महत्त्वाचे असल्याचे वांगचुक यांनी स्पष्ट केले.

आमिर खानलाही लगावला टोला

दरम्यान, ‘थ्री इडियट्स’ चित्रपटाच्या संदर्भात आमिर खानने केलेल्या वक्तव्यावरही सोनम वांगचुक यांनी प्रतिक्रिया दिली. चित्रपटाची निर्मिती होत असताना आमिर खानला आपण माहीतही नव्हतो, या दाव्यावर वांगचुक यांनी उपरोधिक भाष्य केले.

आपली आमिर खानसोबत यापूर्वी सविस्तर भेट झाली होती आणि त्या भेटीत त्याने विविध कल्पनांबाबत चर्चा केली होती, असा दावा वांगचुक यांनी केला. आमिर खान कदाचित ‘गजनी’ चित्रपटातील भूमिकेत इतका रमला असावा की त्याला ‘शॉर्ट टर्म मेमरी लॉस’ झाला असावा, असा टोला त्यांनी लगावला.

भेटीतून मिळालेल्या कल्पनांचा उल्लेख करणे मात्र आमिर विसरला असावा, असा उपरोधिक चिमटाही वांगचुक यांनी काढला.