आयची-नागोया (जपान) : विदर्भाची कन्या आणि भारतीय रिकर्व्ह तिरंदाज कुमकुम मोहोड हिने आशियाई क्रीडा स्पर्धेत ऐतिहासिक कामगिरी करत महिलांच्या वैयक्तिक रिकर्व्ह प्रकारात सुवर्णपदक पटकावले. अंतिम सामन्यात दक्षिण कोरियाच्या ओह येजिनचा शूट-ऑफमध्ये पराभव करत कुमकुमने 6-5 असा विजय मिळवला. या कामगिरीसह या प्रकारातील भारताची 48 वर्षांची पदकाची प्रतीक्षा संपली.
दोनदा पिछाडीवर, तरीही दमदार पुनरागमन
अंतिम सामन्यात कुमकुमला सुरुवातीला 3-1 अशी पिछाडी सहन करावी लागली. त्यानंतर तिने जोरदार पुनरागमन करत 3-3 अशी बरोबरी साधली. मात्र, येजिनने पुन्हा 5-3 अशी आघाडी घेतली. निर्णायक पाचव्या सेटमध्ये कुमकुमने दबाव झुगारून तीन अचूक 10 गुणांची नोंद केली आणि सामना 5-5 असा बरोबरीत आणला.
त्यानंतर सामना शूट-ऑफमध्ये गेला. येजिनने आठ गुण मिळवले, तर कुमकुमने अचूक 10 गुणांचा निशाणा साधत सुवर्णपदकावर नाव कोरले.
स्पर्धेतील दुसरे सुवर्ण, तिसरे पदक
2026 च्या आशियाई क्रीडा स्पर्धेतील कुमकुमचे हे दुसरे सुवर्णपदक आहे. यापूर्वी तिने अंकिता भाकत आणि कीर्ती शर्मा यांच्यासोबत महिलांच्या रिकर्व्ह सांघिक स्पर्धेत सुवर्णपदक मिळवले होते. तसेच, धीरज बोम्मादेवरासोबत मिश्र रिकर्व्ह प्रकारात तिने रौप्यपदक जिंकले होते.
तिरंदाजीमध्ये भारताने आतापर्यंत पाच सुवर्ण, दोन रौप्य आणि एक कांस्य अशी एकूण आठ पदके मिळवली आहेत. त्यापैकी पाच सुवर्णपदकांचा वाटा भारतीय तिरंदाजांनी उचलला आहे.
48 वर्षांची प्रतीक्षा संपली
1978 मध्ये आशियाई क्रीडा स्पर्धेत तिरंदाजीचा समावेश झाल्यापासून महिलांच्या वैयक्तिक रिकर्व्ह प्रकारात भारताला पदक मिळाले नव्हते. कुमकुम मोहोडने ही प्रतीक्षा संपवत या प्रकारात भारताला पहिले सुवर्णपदक मिळवून दिले.
उपांत्य फेरीत चीनच्या तिरंदाजावर मात
अंतिम फेरीपूर्वीच्या उपांत्य सामन्यात कुमकुमने चीनच्या जिंगयी झूचा 6-2 असा पराभव केला. तिने 28-27, 30-30, 29-29 आणि 29-28 अशा गुणांसह हा सामना जिंकला. त्यापूर्वी उपांत्यपूर्व फेरीत तिने विद्यमान विश्वविजेती कांग चेयोंगचा 6-4 असा पराभव केला होता.
सांघिक प्रकारात सुवर्ण, मिश्र प्रकारात रौप्य आणि आता वैयक्तिक रिकर्व्हमध्ये सुवर्ण अशी कामगिरी करत कुमकुमने आशियाई क्रीडा स्पर्धेतील आपल्या पदकांची हॅट्ट्रिक पूर्ण केली आहे.