महिलांच्या १० मीटर एअर रायफल सांघिक प्रकारात भारताची कामगिरी; चीनला सुवर्णपदक
नागोया : आयची-नागोया आशियाई क्रीडा स्पर्धेत भारताने पदकाचे खाते रौप्यपदकाने उघडले आहे. महिलांच्या १० मीटर एअर रायफल सांघिक प्रकारात एलावेनिल वलारिवान, सोनम मस्कर आणि विदर्शा विनोद यांच्या संघाने उत्कृष्ट कामगिरी करत भारताला रौप्यपदक मिळवून दिले.
भारतीय संघाने १८९८ गुणांसह स्पर्धा पूर्ण केली. चीनने १९०४.०२ गुणांसह सुवर्णपदक पटकावले, तर जपान १८९७.१ गुणांसह तिसऱ्या स्थानावर राहिला. चीनने या कामगिरीसह या प्रकारातील यापूर्वीचा १९०२ गुणांचा विक्रमही मागे टाकला.
भारताकडून एलावेनिल वलारिवानने ६३३.५ गुणांची कामगिरी नोंदवली. तिच्यासह सोनम मस्करनेही अंतिम फेरीत प्रवेश केला आहे. भारतीय संघाचे पदक निश्चित होण्यासाठी इतर नेमबाजांच्या कामगिरीकडेही लक्ष होते.
भारतीय संघाला मागे टाकण्यासाठी कोरियन संघाला शेवटच्या फेऱ्यांमध्ये मोठी कामगिरी करण्याची आवश्यकता होती. मात्र, अपेक्षित गुणांची नोंद न झाल्याने भारताचे रौप्यपदक निश्चित झाले.
दरम्यान, आशियाई क्रीडा स्पर्धेत भारताला आणखी एका खेळात पदकाची संधी निर्माण झाली आहे. महिलांच्या पारंपरिक ६० किलो एमएमए प्रकारात सुचिका तारियालने अल्तानखिमेग बैगलमाचा पराभव करत उपांत्य फेरीत प्रवेश केला आहे. या विजयामुळे सुचिकाचे पदकही निश्चित झाले आहे.