पुणे : दिवंगत उपमुख्यमंत्री अजित पवार यांच्या विमान अपघाताच्या तपासावरून राष्ट्रवादी काँग्रेसमधील राजकीय वाद पुन्हा चव्हाट्यावर आला आहे. खासदार सुप्रिया सुळे यांनी अपघाताच्या चौकशीबाबत उपस्थित केलेल्या प्रश्नांना उपमुख्यमंत्री सुनेत्रा पवार यांनी प्रत्युत्तर दिले आहे. अजितदादांच्या अपघाताचे राजकारण करू नये. तपास यंत्रणांवर आमचा विश्वास असून, त्यांना चौकशी पूर्ण करण्यासाठी वेळ दिला पाहिजे, असे सुनेत्रा पवार यांनी स्पष्ट केले.
अजित पवार यांच्या विमान अपघाताला बराच कालावधी उलटला आहे. तरीही या प्रकरणात अद्याप गुन्हा दाखल का करण्यात आलेला नाही, असा सवाल सुप्रिया सुळे यांनी केला होता. इतर घटनांमध्ये तातडीने गुन्हे दाखल केले जातात, मग अजित पवार यांच्या अपघाताच्या प्रकरणात अशी तत्परता का दाखवली जात नाही, असा प्रश्नही त्यांनी उपस्थित केला.
सुप्रिया सुळे यांच्या या भूमिकेमुळे राष्ट्रवादी काँग्रेसच्या दोन्ही गटांमध्ये पुन्हा आरोप-प्रत्यारोप सुरू झाले आहेत. यावर प्रतिक्रिया देताना सुनेत्रा पवार यांनी कुटुंबाच्या भावनांचा उल्लेख केला. अजितदादांना गमावण्याचे दुःख मला आणि माझ्या मुलांना किती आहे, हे आमच्यापेक्षा दुसऱ्या कोणाला अधिक कळणार? त्यामुळे त्यांच्या अपघाताचे राजकारण कोणीही करू नये, असे त्यांनी म्हटले.
अजित पवार यांच्या विमान अपघाताच्या तपासाबाबत पंतप्रधान नरेंद्र मोदी, केंद्रीय गृहमंत्री अमित शाह आणि मुख्यमंत्री देवेंद्र फडणवीस यांच्याशी चर्चा झाल्याचेही सुनेत्रा पवार यांनी सांगितले. तपास लवकरात लवकर पूर्ण व्हावा, अशी कुटुंबाचीही इच्छा आहे. मात्र, तपास यंत्रणांना त्यांचे काम पूर्ण करण्यासाठी आवश्यक वेळ दिला पाहिजे, असे त्यांनी स्पष्ट केले.