नवी दिल्ली : अमेरिका-इराण तणावाच्या पार्श्वभूमीवर गेल्या काही दिवसांपासून कच्च्या तेलाच्या दरात चढ-उतार सुरू आहेत. दरम्यान, अमेरिकेचे राष्ट्राध्यक्ष डोनाल्ड ट्रम्प यांनी कच्च्या तेलाच्या किमती लवकरच मोठ्या प्रमाणात घसरतील, असे विधान केले आहे. त्यांच्या या वक्तव्यानंतर आंतरराष्ट्रीय बाजारात तेलाच्या दरात घसरण नोंदवण्यात आली.
अमेरिका-इराण संघर्षामुळे कच्च्या तेलाच्या दराने काही काळ प्रति बॅरल १०० डॉलरचा टप्पा ओलांडला होता. त्यामुळे तेल आयातीवर मोठ्या प्रमाणात अवलंबून असलेल्या देशांसमोर महागाईचे आव्हान निर्माण होण्याची शक्यता व्यक्त केली जात होती. मात्र, आता परिस्थितीत काहीसा बदल होताना दिसत आहे.
संयुक्त राष्ट्र महासभेतील आपल्या भाषणात ट्रम्प यांनी इराणला करारासाठी संधी देण्याचे आवाहन केले होते. त्याचवेळी त्यांनी करार न झाल्यास कठोर कारवाईचा इशाराही दिला. त्यानंतर अमेरिकन अधिकारी आणि इराणी प्रतिनिधींमध्ये महत्त्वपूर्ण चर्चा झाल्याचे ट्रम्प यांनी सांगितले.
या घडामोडींनंतर आंतरराष्ट्रीय बाजारात ब्रेंट क्रूडचा दर १०० डॉलरच्या खाली आला. बुधवारी ब्रेंट क्रूड सुमारे ९८ डॉलर प्रति बॅरलवर व्यवहार करत होते. तर डब्ल्यूटीआय क्रूडचा दर सुमारे ८९ डॉलर प्रति बॅरलपर्यंत घसरला. मूरबान क्रूडच्या दरातही घट होऊन तो सुमारे १०८ डॉलर प्रति बॅरलच्या आसपास पोहोचला.
कच्च्या तेलाच्या दरातील घसरण कायम राहिल्यास त्याचा परिणाम तेल आयात करणाऱ्या देशांवर होऊ शकतो. मात्र, आंतरराष्ट्रीय बाजारातील दर, डॉलरच्या तुलनेतील रुपयाचे मूल्य आणि देशांतर्गत कररचना यांसह विविध घटकांवर भारतातील पेट्रोल-डिझेलच्या किमती अवलंबून असतात. त्यामुळे कच्चे तेल स्वस्त झाले म्हणून पेट्रोल-डिझेलचे दर तातडीने कमी होतीलच, असे निश्चितपणे म्हणता येत नाही.