मुंबई : अक्षय कुमार आणि सैफ अली खान यांच्या प्रमुख भूमिका असलेल्या ‘हैवान’ या चित्रपटाची प्रदर्शनापूर्वी चांगलीच चर्चा होती. प्रियदर्शन यांच्या दिग्दर्शनाखाली तयार झालेला हा चित्रपट ११ सप्टेंबर २०२६ रोजी प्रदर्शित झाला. सुरुवातीला चित्रपटाला सकारात्मक प्रतिक्रिया मिळाल्या असल्या तरी बॉक्स ऑफिसवरील कमाई मात्र अपेक्षेप्रमाणे होताना दिसत नाही.
‘सॅकनिल्क’च्या अर्ली ट्रेंडनुसार, चित्रपटाने प्रदर्शनाच्या दुसऱ्या दिवशी म्हणजेच शनिवारी सुमारे २.५० कोटी रुपयांची कमाई केली. पहिल्या दिवशी चित्रपटाने जवळपास ३ कोटी रुपयांचा व्यवसाय केल्याची माहिती आहे. त्यामुळे दोन दिवसांत ‘हैवान’ची भारतातील एकूण कमाई सुमारे ५.५० कोटी रुपये झाली आहे. ग्रॉस कलेक्शनचा आकडा ६.६० कोटी रुपयांपर्यंत पोहोचल्याचे सांगितले जात आहे.
चित्रपटाचे आतापर्यंत ५,७५९ शो झाले आहेत. तर पहिल्या दिवशी ७,२२४ शो पार पडले होते. जगभरातील कमाईचा आकडा सुमारे ८.६० कोटी रुपये असल्याचे वृत्त आहे.
स्टारकास्ट असूनही कमाई संथ
‘हैवान’मध्ये अक्षय कुमार आणि सैफ अली खान यांच्यासोबत बोमन इराणी, श्रिया पिळगावकर आणि सैयामी खेर यांच्या महत्त्वाच्या भूमिका आहेत. ज्येष्ठ अभिनेते असरानी यांचीही चित्रपटात भूमिका आहे. विशेष म्हणजे, अभिनेता मोहनलाल यांचा कॅमिओही चित्रपटात पाहायला मिळतो.
मल्याळम चित्रपटाचा हिंदी रिमेक
‘हैवान’ हा २०१६ मध्ये प्रदर्शित झालेल्या मल्याळम ‘ओप्पम’ या चित्रपटाचा हिंदी रिमेक आहे. मूळ चित्रपटाला प्रेक्षकांचा चांगला प्रतिसाद मिळाला होता. त्यामुळे हिंदी आवृत्तीकडूनही मोठ्या अपेक्षा होत्या. मात्र सध्या बॉक्स ऑफिसवरील आकडे पाहता चित्रपटाची सुरुवात काहीशी संथ झाल्याचे चित्र आहे.
आता रविवारच्या सुट्टीचा चित्रपटाच्या कमाईवर किती परिणाम होतो आणि विकेंडनंतर ‘हैवान’च्या व्यवसायाला वेग मिळतो का, याकडे सर्वांचे लक्ष लागले आहे.