भाजपची नवी टीम जाहीर; विनोद तावडे सरचिटणीसपदी कायम, स्मृती इराणींनाही मोठी जबाबदारी
नवी दिल्ली : आगामी विधानसभा आणि लोकसभा निवडणुकांच्या पार्श्वभूमीवर भाजपने आपल्या राष्ट्रीय संघटनेत मोठे बदल केले आहेत. पक्षाचे राष्ट्रीय अध्यक्ष नितीन नबीन यांनी नवी राष्ट्रीय कार्यकारिणी जाहीर केली. या नव्या टीममध्ये विविध राज्यांतील नेत्यांना स्थान देतानाच संघटनात्मक अनुभव आणि आगामी निवडणुकांचे समीकरण लक्षात घेतल्याचे दिसत आहे.
महाराष्ट्रातील खासदार विनोद तावडे यांच्यावर पुन्हा एकदा राष्ट्रीय सरचिटणीसपदाची जबाबदारी सोपवण्यात आली आहे. तर माजी केंद्रीय मंत्री स्मृती इराणी यांचीही राष्ट्रीय सरचिटणीसपदी नियुक्ती करण्यात आली आहे. लोकसभा निवडणुकीनंतर तुलनेने कमी सक्रिय दिसलेल्या इराणी यांना पक्षाने पुन्हा महत्त्वाची जबाबदारी दिल्याने त्यांच्या भूमिकेकडे लक्ष लागले आहे.
महाराष्ट्रातील नेत्यांना महत्त्वाची जबाबदारी
नव्या राष्ट्रीय टीममध्ये महाराष्ट्रातील काही प्रमुख नेत्यांचा समावेश करण्यात आला आहे. विनोद तावडे यांच्यासह डॉ. भारती पवार, पियूष गोयल आणि प्रीती गांधी यांनाही महत्त्वाची जबाबदारी देण्यात आली आहे.
डॉ. भारती पवार यांची राष्ट्रीय उपाध्यक्षपदी नियुक्ती करण्यात आली असून, पियूष गोयल यांच्याकडे राष्ट्रीय कोषाध्यक्षपदाची जबाबदारी देण्यात आली आहे. तर प्रीती गांधी यांची सोशल मीडिया सह-संयोजकपदी निवड करण्यात आली आहे.
वसुंधरा राजे यांचीही राष्ट्रीय कार्यकारिणीत एन्ट्री
राजस्थानच्या माजी मुख्यमंत्री वसुंधरा राजे सिंधिया यांची राष्ट्रीय उपाध्यक्षपदी नियुक्ती करण्यात आली आहे. बी. एल. संतोष यांना राष्ट्रीय महामंत्री (संघटन) पदावर कायम ठेवण्यात आले आहे. राजेश मंगल यांच्याकडे राष्ट्रीय सह-कोषाध्यक्षपदाची जबाबदारी देण्यात आली आहे.
उत्तर प्रदेशला विशेष महत्त्व
आगामी उत्तर प्रदेश विधानसभा निवडणुकीच्या पार्श्वभूमीवर या राज्याला नव्या कार्यकारिणीत विशेष महत्त्व देण्यात आले आहे. उत्तर प्रदेशातील आठ नेत्यांना राष्ट्रीय पातळीवर संधी देण्यात आली आहे.
नव्या टीममध्ये १३ राष्ट्रीय उपाध्यक्ष, ८ राष्ट्रीय महामंत्री आणि १६ राष्ट्रीय मंत्री आहेत. त्यामुळे आगामी निवडणुकांसाठी पक्षाने संघटनात्मक पातळीवर तयारी सुरू केल्याचे स्पष्ट होत आहे.
भाजपच्या या नव्या नियुक्त्यांमधून आगामी निवडणुकांसाठी पक्षाची संघटनात्मक रणनीती अधिक मजबूत करण्याचा प्रयत्न दिसून येत आहे. विशेषतः उत्तर प्रदेश आणि महाराष्ट्रातील नेत्यांना दिलेल्या जबाबदाऱ्यांमुळे पुढील काळात त्यांची भूमिका महत्त्वाची ठरणार आहे.