मोदींकडून जॉर्जिया मेलोनी यांचे अभिनंदन; इटलीच्या पंतप्रधानपदावर सलग सर्वाधिक काळ राहण्याचा विक्रम

नवी दिल्ली : इटलीच्या पंतप्रधान जॉर्जिया मेलोनी यांनी सलग सर्वाधिक काळ पंतप्रधानपद भूषवण्याचा विक्रम केल्याबद्दल पंतप्रधान नरेंद्र मोदी यांनी त्यांचे अभिनंदन केले आहे. मोदी यांनी सोशल मीडिया पोस्टद्वारे मेलोनी यांना शुभेच्छा देताना त्यांचा उल्लेख ‘मैत्रीण’ असा केला.

मेलोनी यांच्या नेतृत्वावर इटलीच्या जनतेने दाखवलेला विश्वास आणि त्यांची निष्ठा या विक्रमातून अधोरेखित होत असल्याचे मोदी यांनी म्हटले. तसेच, भारत आणि इटलीमधील विशेष धोरणात्मक भागीदारी अधिक मजबूत करण्यासाठी मेलोनी यांची मैत्री महत्त्वपूर्ण ठरली असल्याचेही त्यांनी नमूद केले.

दोन्ही देशांतील जनतेच्या उज्ज्वल आणि समृद्ध भविष्यासाठी भविष्यातही एकत्रितपणे काम करण्याची अपेक्षा मोदी यांनी व्यक्त केली. मेलोनी यांना पुढील वाटचालीसाठीही त्यांनी शुभेच्छा दिल्या.

सलग 1,413 दिवस सत्तेत

जॉर्जिया मेलोनी यांच्या सरकारने शुक्रवारी सलग 1,413 दिवसांचा कार्यकाळ पूर्ण करत नवा विक्रम प्रस्थापित केला. 1946 मध्ये इटली प्रजासत्ताक झाल्यानंतर एखाद्या सरकारचा हा सर्वाधिक सलग कार्यकाळ ठरला आहे.

यापूर्वी हा विक्रम माजी पंतप्रधान सिल्व्हियो बर्लुस्कोनी यांच्या दुसऱ्या सरकारच्या नावावर होता. 2001 ते 2005 या कालावधीत त्यांचे सरकार 1,412 दिवस सत्तेत होते. मेलोनी यांनी हा विक्रम एका दिवसाने मागे टाकला.

22 ऑक्टोबर 2022 रोजी जॉर्जिया मेलोनी यांनी इटलीच्या पहिल्या महिला पंतप्रधान म्हणून पदभार स्वीकारला. त्या उजव्या विचारसरणीच्या ‘ब्रदर्स ऑफ इटली’ पक्षाच्या प्रमुख आहेत.

इटलीतील राजकीय अस्थिरतेच्या पार्श्वभूमीवर विक्रम

इटलीमध्ये गेल्या अनेक दशकांपासून सरकारे वारंवार बदलण्याचा इतिहास राहिला आहे. 1946 नंतर देशात आतापर्यंत अनेक सरकारे सत्तेवर आली असून, त्यांचा सरासरी कार्यकाळ तुलनेने कमी राहिला आहे.

या पार्श्वभूमीवर मेलोनी यांच्या नेतृत्वाखालील उजव्या विचारसरणीच्या आणि पुराणमतवादी पक्षांच्या आघाडी सरकारने जवळपास चार वर्षे सत्ता टिकवणे ही महत्त्वाची राजकीय कामगिरी मानली जात आहे.

विक्रमाच्या निमित्ताने पक्षाकडून जल्लोष

मेलोनी यांच्या सरकारने सलग सर्वाधिक काळ सत्ता टिकवल्याच्या पार्श्वभूमीवर त्यांच्या पक्षाकडून शुक्रवारी दक्षिण इटलीतील बारी शहरात रॅलीचे आयोजन करण्यात आले आहे. या कार्यक्रमात मेलोनीही सहभागी होऊन भाषण करणार आहेत.

दरम्यान, विरोधक आणि समीक्षकांनी मात्र सरकारचा प्रदीर्घ कार्यकाळ हीच उपलब्धी म्हणून मांडली जात असल्याची टीका केली आहे.

मोदी-मेलोनी आणि ‘मेलोडी’ची चर्चा

मे 2026 मध्ये नरेंद्र मोदी इटली दौऱ्यावर गेले होते. या भेटीदरम्यान मोदी यांनी जॉर्जिया मेलोनी यांना ‘मेलोडी’ टॉफीचे पाकीट भेट दिले होते. मेलोनी यांनी या भेटीचा व्हिडिओ सोशल मीडियावर शेअर करत मोदींचे आभार मानले होते.