वॉशिंग्टन : इराण युद्धाशी संबंधित संवेदनशील माहिती माध्यमांपर्यंत कशी पोहोचली, याचा शोध घेण्यासाठी अमेरिकन प्रशासनाने तपासाला वेग दिला आहे. या चौकशीचा भाग म्हणून पेंटागॉनने जॉईंट स्टाफशी संबंधित सुमारे ५० अधिकारी आणि नागरी कर्मचाऱ्यांची पॉलिग्राफ चाचणी घेतल्याची माहिती समोर आली आहे.
अमेरिकन माध्यमांच्या वृत्तानुसार, युद्धादरम्यान अमेरिकेकडील काही महत्त्वाच्या शस्त्रसाठ्यात घट झाल्याची माहिती माध्यमांमध्ये प्रसिद्ध झाली होती. ही संवेदनशील माहिती लष्करी यंत्रणेतून कोणत्या व्यक्तीने पत्रकारांपर्यंत पोहोचवली, याचा तपास सध्या सुरू आहे.
या प्रकरणात जॉईंट स्टाफशी संबंधित अधिकारी आणि कर्मचाऱ्यांची चौकशी करण्यात आली. त्यांच्याकडून गोपनीय माहिती कोणत्या पत्रकाराला किंवा माध्यमाला दिली का, याबाबत प्रश्न विचारण्यात आले. त्यानंतर काहींची पॉलिग्राफ चाचणीही घेण्यात आली.
पॉलिग्राफ टेस्ट म्हणजे काय?
पॉलिग्राफ चाचणीला सामान्यतः ‘लाय डिटेक्टर टेस्ट’ म्हटले जाते. या चाचणीदरम्यान संबंधित व्यक्तीला विविध प्रश्न विचारले जातात. उत्तर देताना होणारे हृदयाचे ठोके, श्वासोच्छवास आणि शरीरातील इतर शारीरिक बदल उपकरणाद्वारे नोंदवले जातात.
मात्र पॉलिग्राफ चाचणीतील शारीरिक प्रतिक्रिया म्हणजे व्यक्ती खोटे बोलत असल्याचा थेट पुरावा नसतो. त्यामुळे तपास यंत्रणांकडून या चाचणीचा वापर चौकशीतील एक साधन म्हणून केला जातो.