पंकज त्रिपाठी, अली फजल आणि दिव्येंदू शर्माचा बहुप्रतीक्षित चित्रपट ४ सप्टेंबरला थिएटरमध्ये

मुंबई : ‘मिर्झापूर’ या लोकप्रिय वेबसीरिजनंतर आता याच फ्रँचायझीचा थरार मोठ्या पडद्यावर पाहायला मिळणार आहे. ‘मिर्झापूर: द मूव्ही’ प्रदर्शनापूर्वीच चर्चेत आला असून, सिनेमाबाबत एक महत्त्वाची माहिती समोर आली आहे. केंद्रीय चित्रपट प्रमाणन मंडळाकडून (CBFC) या चित्रपटाला ‘A’ प्रमाणपत्र देण्यात आले आहे. विशेष म्हणजे, या सिनेमाचा रनटाइमही समोर आला असून तो तब्बल १९७.१९ मिनिटे, म्हणजेच जवळपास ३ तास १७ मिनिटांचा आहे.

केवळ प्रौढांसाठी पाहता येणार सिनेमा

CBFCच्या उपलब्ध माहितीनुसार, २९ ऑगस्ट रोजी ‘मिर्झापूर: द मूव्ही’ला प्रमाणपत्र देण्यात आले. एक्सेल एंटरटेनमेंटने या चित्रपटाच्या प्रमाणपत्रासाठी अर्ज केला होता. त्यानंतर मुंबईतील प्रादेशिक कार्यालयातून सिनेमाला प्रमाणपत्र मिळाले.

चित्रपटाला A सर्टिफिकेट मिळाल्याने तो केवळ प्रौढ प्रेक्षकांसाठी प्रदर्शित केला जाणार आहे. ‘मिर्झापूर’च्या आधीच्या सीझनमध्ये पाहायला मिळालेली हिंसा, अॅक्शन आणि गुन्हेगारी विश्वाची पार्श्वभूमी चित्रपटातही कायम असल्याचे मानले जात आहे.

३ तासांपेक्षा अधिक काळ रंगणार थरार

‘मिर्झापूर: द मूव्ही’चा रनटाइमही विशेष चर्चेचा विषय ठरला आहे. चित्रपटाची लांबी १९७.१९ मिनिटे असल्याची माहिती CBFCच्या नोंदीत आहे. म्हणजेच प्रेक्षकांना जवळपास ३ तास १७ मिनिटांचा अॅक्शन आणि क्राइम थ्रिलरचा अनुभव मिळणार आहे.

मिर्झापूरच्या गादीसाठी पुन्हा संघर्ष

चित्रपटाची कथा पुन्हा एकदा मिर्झापूरच्या सत्तेभोवती फिरताना दिसणार आहे. जुन्या शत्रूंचे पुनरागमन आणि नव्या संकटांमुळे मिर्झापूरच्या गादीसाठीची लढाई अधिक तीव्र होणार आहे.

सत्ता आणि वर्चस्व मिळवण्यासाठी अनेक दावेदार आमनेसामने येतील. रक्ताच्या बदल्याची कहाणी आणि मिर्झापूरच्या हिंसक अंडरवर्ल्डवरील नियंत्रणासाठी सुरू होणारा संघर्ष यामुळे चित्रपटात अॅक्शनसोबतच क्राइम थ्रिलरचा तडका पाहायला मिळणार आहे.

गुड्डू, मुन्ना आणि कालीन भैया पुन्हा दिसणार

दिग्दर्शक गुरमीत सिंह यांनी या चित्रपटाची धुरा सांभाळली आहे. प्रेक्षकांच्या आवडत्या भूमिका पुन्हा मोठ्या पडद्यावर परतणार आहेत. अली फजल गुड्डू पंडित, दिव्येंदू शर्मा मुन्ना त्रिपाठी आणि पंकज त्रिपाठी कालीन भैया यांच्या भूमिकेत दिसतील.

याशिवाय बबलू पंडितच्या भूमिकेत यावेळी जितेंद्र कुमार दिसणार आहेत. या भूमिकेत यापूर्वी विक्रांत मॅसीने काम केले होते.

४ सप्टेंबरला होणार रिलीज

‘मिर्झापूर’ फ्रँचायझीची सुरुवात २०१८ मध्ये झाली. पहिल्या सीझनला मिळालेल्या दमदार प्रतिसादानंतर २०२० मध्ये दुसरा आणि २०२४ मध्ये तिसरा सीझन प्रदर्शित झाला.

आता हीच लोकप्रिय कथा मोठ्या पडद्यावर येत आहे. ‘मिर्झापूर: द मूव्ही’ ४ सप्टेंबर २०२६ रोजी देशभरातील चित्रपटगृहांमध्ये प्रदर्शित होणार आहे. त्यामुळे गुड्डू पंडित, मुन्ना त्रिपाठी आणि कालीन भैया यांच्यातील पुढचा संघर्ष पाहण्यासाठी चाहत्यांची उत्सुकता शिगेला पोहोचली आहे.